Corsou: Minister Charles Cooper presente na e di cuater edicion di ‘Invest in Willemstad’

Minister Charles Cooper a participa riba diaranson 30 di november na e di 4 edicion di ‘Invest in Willemstad’. Esaki ta un encuentro dos biaha pa aña pa E inversionista, desaroyado, gruponan di interes y gobernantenan tocante inversion den nos centro di Ciudad.

Durante di e encuentro aki, Director di Sector di Infrastructura y Planificacion Urbano di VVRP,  Caroline Manuel a duna un presentacion amplio di UNESCO su derecho y obligacion, tambe con nos Willemstad como patrimonio mundial reconoce pa UNESCO ta atende cu esaki. E aña aki nos ta celebrando 25 aña!

Tambe Stichting Monumentenzorg Curaçao a duna un presentacion titula: ‘Trade or not to trade: Cherishing Monuments in changing times’. Mas topico interesante cu a bin dilanti tabata ‘Willemstad, Regenerative Urban Development’ presenta pa Universidad di Corsou.

Durante di e sesion, tabata tin un intercambio cu e cuater districtonan cu ta forma Willemstad, esta Punda, Otrobanda, Scharloo y Pietermaai.

Na final a haci pregunta na e publico como tambe na Minister Cooper pa e duna su punto di bista. Tur presente a ricibi informacion valioso caminda Minister Cooper a keda satisfecho cu e encuentro y ta spera cu esaki lo duna su frutanan concreto di inversion, cu lo ta un estimulo pa Corsou su economia.