Container cu bela aden tuma den beslag riba sospecho di droga

Na warda di Shaba un container di binti pia ta pendiente un investigacion. E container tabata na un agencia na Playa y e tabata yen di bela cu lo mester transporta bek pa Panama.

E container ta procedente di Panama, pero e calidad di e belanan no tabata bon pa cual e doño di e agencia a dicidi cu e lo manda tur bek. Mescos cu ora un container bin Aruba, tambe ora di sali cu carga Duana ta controla e container completamente. Den pasado mas cu un biaha a haya droga saliendo di Aruba pa Europa. Den e caso aki e belanan ta bayendo Panama.

Durante e control cu cacho y algun test esaki a test positivo pa droga. Den e caso aki cocaina. Mirando esaki autoridad a dicidi di tuma e container den beslag. A yega di sosode den pasado cu cu ora test positivo durante control, despues di bay laboratorio, e ta resulta negativo. P’esey mes a move e container pa warda di Polis na Shaba y wardando e testnan di laboratorio pa asina confirma si berdaderamente ta cocaina mes.

Dia e belanan a yega tambe a haci control. Awo e belanan ta bay bek y e test a resulta positivo durante e control. Durante dia lo tende si a laga e container liber of toch ta droga mes tabatin den e belanan.