Coach ta duna les y ladron ta haci fiesta den su auto: A bay cu mashin di coba muraya y dos boormashin

Dialuna den careda di 9:30pm polis a presenta na Riverplate caminda cu un coach a termina di duna les y tabata cla pa bay cas.

Esaki tabata momento cu el a bin ripara cu varios mashin cu el a fia for di hende, entre otro un Hilti, dos boormashin como tambe dos bril, a disparce. Ya caba ora ta papia di Hilti, ta papia di basta placa ya cu e mashinnan aki cu ta uza pa coba muraya, cual prijs por yega na mas di mil florin. Boormashin tambe ta costa balente placa.

El a conta polis cu su auto tabata cera y e no sa con nan a habri su auto y bay cu tur e articulonanan aki. Polis a tuma datos di tur esaki y lo bay pasa esaki na e departamento di recherche mirando cu tin camara den e area cu lo a graba esaki. 

Por conclui pues, cu e persona cu a bay cu e mashinnan aki ta hende cu sa di e balor di e mashinnan aki y/of lo ta sa di un hende cu tin mester mashin pa coba muraya pa cual a dicidi di bay cu ne.

E ciudadano eyfo, cu haya un hende bin bend’e Hilti mashin of boormashin, pa ta masha cauteloso, cu esakinan no ta procedente for di robo.