Connect with us

Chabad Aruba a celebra Hanukkah cu parada di Menorah

Aruba

Chabad Aruba a celebra Hanukkah cu parada di Menorah


Hanukkah, conoci tambe como festival di luz, ta un celebracion Hudiu cu ta conmemora e recuperacion di e di dos tempel di Jerusalem y e rebelion di e Macabeonan contra e imperio Seleucida. Ta celebra e independencia Hudiu durante ocho dia.

E tradicion Hudiu ta papia di un milager, den cual a logra cende un lamp’i kerosin di e tempel durante ocho dia largo consecutivo cu un cantidad limita di azeta, cu lo a yega pa un dia so. Esaki ta locual a duna origen na e custumber principal di e festival aki, cu ta di cende, un ‘candelabrum’ di nuebe brasa yama Menorah. Cada anochi, ta cende un bela adicional di e Menorah te ora cu tur ocho ta cendi.

Comunidad Hudiu na Aruba tambe a celebra esaki den nan mes manera y e aña aki esaki a tuma luga den un forma diferente debi na e medidanan na vigor di e pandemia. Rabbi Blasberg di e organisacion Chabad Aruba a conta cu nan kier a trece e mensahe di Hanukkah pa dilanti, asina recordando e milager di e azeta cu a dura ocho dia largo hopi aña pasa.

Nan a purba haya un manera diferente y ‘safe’ pa convoca e mensahe aki. Asina ey nan a bin cu e idea di haci un parada di auto cu e Menorah. Cada auto tabatin un Menorah y a core rond di nos isla y a parkeer na e parkeerplaats pa tene e ceremonia.

Rabbi Blasberg a conta cu e ta kere cu sigur nan a logra trece e mensahe aki pa dilanti den un manera unico, alegre y bunita y cu tur esunnan presente tabata mas cu contento cu resultado di con esaki a culmina. Rabbi Blasberg a splica tambe cu esaki ta di ocho aña cu Chabad Aruba a tene un celebracion di Hanukkah na Aruba pero cu rond mundo ya nan tin 30 pa 40 aña ta celebra esaki.

Pa cobertura mas amplio lesa edicion di TREMPAN mañan.





Source link

Click to comment

Leave a Reply

Your email address will not be published. Required fields are marked *

More in Aruba

To Top