Connect with us

Centro di rehabilitacion “Con Animo” yudando varios Rubiano cu problema di adiccion na Colombia

Aruba

Centro di rehabilitacion “Con Animo” yudando varios Rubiano cu problema di adiccion na Colombia


E no ta un secreto cu adiccion di droga y alcohol ta un problematica grandi riba nos isla. Mayoria bes, gobierno ta manda nos yiunan di tera sea Hulanda of Republica Dominicana pa ricibi tratamento profesional. Den mayoria caso, e pashent ta regresa cas y ta cay bek den mesun bicio. Tin un luz den horizonte p’e famianan cu ta preocupa pa nan ser keri cu ta den mundo di accion. Awendia tin un organisacion profesional bou liderazgo di un Arubiano cu ta yudando varios yiu di tera na Colombia. 

Jean Paul van der Kuyp ta un ex-adicto, e tin hopi aña “clean” caba. Despues cu el cuminsa biba un bida nobo, el a dedica su tempo na yuda otro, sali for di e mundo di adiccion. E ta propietario di un finca, cu el a converti den un centro di rehabilitacion bou nomber di Corporacion Con Animo. 

Tur cos a cuminsa na aña 2008 ora cu Jean Paul van der Kuyp a yuda un pashent Hulandes sali for di e mundo di adiccion. E no tabata su plan pa atende cu persona nan cu adiccion, sinembargo e pashent aki a keda cinco aña bou guia di Jean Paul, awe e ta sano y bibando un bida saludabel. 

Mientras Jean Paul van der Kuyp tabata yuda e pashent Hulandes aki, el a ricibi mas peticion pa yuda mas hende. Na aña 2009 e tabatin como shete pashent, e tempo ey su finca tabata chikito compara cu awe. Na 2009 el a confirma su mes cu e lo dedica su bida na yuda otro sali for di adiccion, pa cual ta su trabou diario. Awendia e ta director di e organisacion profesional aki. E finca ta situa na San Antonio del Tequendama, algun ora leu for di capital di Colombia, Bogota. El a converti su finca den un centro di adiccion, a construi mas edificio, pa cual na aña 2015 a logra cumpra e finca completo. Prome cu Jean Paul a ricibi pashent di Aruba, e tabata traha directo cu seguro na Colombia. Na dado momento e tabatin como diesshete Colombia den su organisacion. 

Jean Paul van der Kuyp a sigui varios curso rond mundo relaciona cu adiccion. Finca Pa Que Mas ta consisti di dos cas pa hende homber y dos pa hende muhe. Cada pashent ta ricibi su camber apart. Na aña 2016 Jean Paul a ricibi e prome pashent di Aruba, e tempo ey bou maneho di ex-Minister Arthur Dower. For di e tempo ey, un boca a keda bisa otro y awendia ta conta cu nuebe pashent cu gobierno di Aruba ta subsidia y e restonan ta priva, pero mayoria ta hende local di Aruba. 

A purba varios biaha pa yuda e hobennan Aruba. Ta sinti cu si no haci algo, nos hubentud lo bay perdi. A hasta yega na atencion di Jean Paul van der Kuyp cu tin mucha di dies aña cu ya ta den adiccion. Mayoria pashent ta diagnostica cu minimo dos enfermedad. Adiccion ta un enfermedad, por ta cu alcohol, droga of mas. 

E pashentnan no ta keda henter dia nan so y haci locual nan kier. Nan tin cu sigui un programa. Centro Con Animo ta conta cu un team medico profesional cu ta yuda e pashentnan, tambe ta conta cu psicologo y psikiatra. E organisacion mes tin un team cu ta percura pa nan alimentacion di tur dia. E modelo cu nan ta uza ta di Hazelden Minnesota. E pashent cu tin mas tempo den e centro actualmente tin cinco aña. El a drenta cu diescinco aña y actualmente tin binti aña di edad. 

E centro tin varios actividad na banda di e programa cu e pashentnan ta sigui. Sea ta gym, pool, un cancha grandi pa sport, sauna, camber apart y tin yamada frecuente pa nan famia na Aruba. Ora un pashent rebeldia, ta kita cierto privilegio for di nan. Si esaki no funciona, ta mand’e pa un centro aliado na Bogota, kende ta mas streng compara cu e centro di Jean Paul. Si e cambia su actitud y demostra interes pa cambio, ta trece bek na finca, si no ta e caso, ta bati alarma y mand’e bek Aruba. E proceso ta encera interes pa cambio for di e pashent mes, claro e centro ta yud’e y gui’e tur dia. E ekipo di centro Con Animo ta traha 24 ora pa dia y shete dia siman.  

Apart di e centro, tin un cas grandi apart otro banda di caya pa esunnan cu tin problema cu adiccion so, pues no mas enfermedad. Porta pa un director, trahado di casino of ken cu a cay den adiccion pero tin dificultad pa sali riba nan mes. E pashentnan aki ta haya mas libertad tambe, apart di nan camber apart, nan tin Direct TV, WIFI y mas, pero e programa pa recupera ta keda mesun cos. Ora di cierto seccion, nan ta crusa caya y participa hunto cu e otro pashentnan den mesun programa. 

E finca ta situa den un area di puro naturalesa, compaña cu parha, bestia y mata. Un sitio cu locual ta resalta ta; paz mental. 

Si tin persona interesa por contact Jean Paul van der Kuyp na (+57) 313 392 3339 of subi nan website; www.conanimo.org. Na final Jean Paul a enfatisa cu: “Adiccion no ta discrimina.” 





Source link

More in Aruba

To Top