Connect with us

Celebra ora bo prohimo ta prospera

Aruba

Celebra ora bo prohimo ta prospera


Por ta e ta zona hopi straño, of algo cu nunca bo no a tende, pero esaki ta demostra crecemento non secular y social cerca tur hende. E ta demostra caracter y sinceridad, e ta kibra cadena di envidia, orguyo, y ta demostra calidad di bo persona.

Hopi no por cu esey, pero locual cu nos ta avisa bo di dje, cu e asunto aki no ta di awe, pero for di principio di mundu, caminda Cain no tabata por cu crecemento di Abel. Pasobra Abel tabata tin Señor na prome luga y tabata biba den obedencia na Dios, pero Cain no tabata asina. 

Ora un hende cu ta hunto cu bo wordo bendiciona di Dios den tur locual cu e ta haci, ta masha importante pa abo celebra, pasobra asina bo ta cumpli cu palabra di Dios cu ta bisa: Stima Dios riba tur cos y stima bo prohimo manera bo mes. Celebrando victoria di bo prohimo bo ta acelera bo victoria private, pasobra Dios ta wak bo curason. Tene cuenta cu con grandi bo prohimo su bendicion ta, toch Dios no a kita nada for di bo pa duna e, locual Dios tin pa abo, ta pa abo e ta.
Corda cu cada bes cu algo bon sosode ta Dios a hacie, pasobra tur cos bon ta bini di ariba.

Y mescos cu abo ta pidi na Dios bo prohimo tambe ta pidi, y no ta pasobra e no a bay mesun scol cu  bo, e no ta pertenece na mesun organisacion non secular of e no ta den bo grupo e no merece, pasobra Dios ta esun cu ta wak tur cos. Nos mester siña nos yiunan esaki, cu nan tambe tin cu bin celebra victoria di nan prohimo. Ora nan mira cu di berdad ta Dios mes a habri porta p’e, sin wak ken e ta, sin huzga dicon e si y ami no, pasobra den Marco Capitulo 9 versiculo 38 te cu 40 Hesus ta duna un splicacion cla bisando;  Juan a bis’e, Maestro nos a mira un hende ta saca demoño den Bo nomber y nos a tah’e, pasobra e no ta sigui nos. Ma Hesus a bisa no tah’e, pasobra no tin ni un hende cu lo haci milager den Mi nomber y djis despues papia malo di Mi. Pasobra esun cu no ta contra nos ta cu nos. 

Aki nan nos ta mira e berdad cu nos tin di pasa over pa nos yiunan, den cual nos ta splica nan cu nos no tin di bringa, pleita, envidia, yena nos mes cu arogancia ora nos mira un otro persona triunfa, pasobra nos bendicion ta na caminda. E enemigo ta purba tur dia pa lanta division den cas, oficina, organisacion, ora bo tende con hende grandi expresa odio y rechaso contra otro, mesora tambe lo bo nota e falta di conocemento di Dios. Pero locual ta tristo cu nan ta pas’e over, y asina otro ta bin carga e mesun rabia, odio, capricho. P’esey e ta para skirbi den e buki di Oseas capitulo 4 versiculo 6+7: Mi pueblo ta wordo destrui pa falta di conocemento.Ora bo no por celebra e victoria di bo prohimo, bo tin di baha bo curason y arepenti.

Skirbi pa Pastoor Marcel Balootje.





Source link

Click to comment

Leave a Reply

Your email address will not be published. Required fields are marked *

More in Aruba

To Top