Connect with us

Caso di rectificacion entama pa Minister Endy Croes contra 24ora.com

Caribe

Caso di rectificacion entama pa Minister Endy Croes contra 24ora.com


Captura de pantalla 2024 05 26 212816

Na luna di april ultimo, abogado mr. Anthony Ruiz, conoci pa ta e abogado preferi di Gabinete Wever-Croes, a manda un carta exigiendo rectificacion pa Minister Edy Croes, pasobra lo a yam’e un ex-convicto durante un edicion di Enfoke. A cumpli cu dicho peticion pasobra berdad nunca tabatin un condena den e caso penal, pues e no ta un “condenado”. Si a dicta sentencia den e casonan civil cu el a entama contra Lotto pa a kit’e “op staande voet” for di trabou debi na, entre otro, enrikisimiento personal y di su famia.

Djey a bin un carta atrobe, no mas pa Enfoke, pero awo pa e articulo riba 24ora.com. E abogado ta insisti cu locual a publica no ta cuadra cu berdad, pa cual a bolbe pidi pa rectificacion. El a skirbi textualmente: “Middels een publicatie op de Facebook-pagina en website van 240ra.com van 22 april 2024 met titel “Ta pidi rectificacion: minister Endy Croes no kier pa yam’e ex-convicto” heeft Headlines Group onware c.q. onjuiste uitlatingen gedaan aan het adres van Croes. Zo heeft Headlines Group tegen beter weten in aangegeven dat in een civiele zaak, in hoger beroep en in cassatie, door de rechter bewezen is verklaard dat Croes zichzelf en zijn familie heeft vertijkt met gelden van Fundacion Lotto pa Deporte en dat de Hoge Raad de uitspraak van het Gemeenschappelijk Hof van Justitie heeft bevestig en Fundacion Lotto pa Deporte in het gelijk heeft gesteld voor wat betreft het ontslag van Croes”.

Como cu e ekipo legal di Headlines Group a conseha negativo, a opta pa no rectifica y topa e minister, ex-sospechoso di husticia aki, den corte mes. A stipula tratamento pa diabierna dia 24 di mei pa 11:30am. Pero, como cu practicamente henter e edificio di corte, probablemente hasta e huesnan ta claba tur merdia den sintonia di Enfoke, no tabatin problema riba nos peticion pa cambia e orario, pa no stroba transmision di e noticiero mas mira y scucha den Caribe Hulandes. A stipula e fecha nobo pa dialuna awo dia 27 di juni 2024 pa 8:30am den sala di corte.

Abogado mr. Anthony Ruiz lo defende Minister Endy Croes den e caso sumario aki, mientras cu abogado mr. David Kock lo defende Headlines Group durante nos defensa contra gobierno. De facto, gobierno kier pa hues forsa e media aki pa rectifica, mientras cu nos ta para riba cu Endy Croes tabata un ex-sospechoso di husticia, a bay cera y a perde su casonan civil y su trabou como director di Fundacion Lotto pa Deporte.

Untitled design 50 1

E caso di “Lotto”

Despues di tabata basta aña miembro di Hunta di Directiva di Fundacion Lotto pa Deporte, dia 1 di april 2009 a dicidi di nombra Jan Hendrik “Endy” Croes como director di e fundacion. A dun’e un bunita salario di Afl. 14.500 pa luna, mas un cantidad di beneficio secundario. 

Den e par di lunanan cu el a dirigi e fundacion, el a haci su mes culpabel na mal maneho y enrikisimento personal, cu dia 4 di januari 2010 caba nan a mand’e cas y pon’e riba “non-actief”, pa Ernst & Young por a haci un investigacion. Dia 30 di juni 2010 a suspende (schors) for di su funcion formalmente, despues cu a haya e rapport final di accountant. 

Cu esey e fundacion a pidi corte pa desolve e contract laboral cu Endy Croes y den sentencia di dia 14 di september 2010, hues a duna e fundacion rason pa kit’e “wegens gewichtige redenen bestaande uit een uitgestelde dringende reden”. Endy Croes a apela y dia 22 di juli 2011 corte a nenga su apelacion. E no a keda contento y a bay den casacion y dia 30 di november 2012, Hoge Raad a subraya e sentencia di Corte Comun di Caribe Hulandes y a duna Fundacion Lotto pa Deporte rason pa kit’e fo’i trabou. 

Mester menciona cu despues di esaki, na aña 2012 a opta pa cana e trayecto penal. A detene Endy Croes na su cas dia 11 di april 2012. Pero na un forma cuestionabel, e Procurador General di e tempo ey a opta pa laga e trayecto penal cay pasobra cu e trayecto civil tabata canando caba. Di e forma ey tres corte a condena Endy Croes na nivel civil pero aunke e tabata sospechoso y tabata cera pa investigacion, e nunca a haya un sentencia penal. 

Tocante Endy Croes 

Jan Hendrik Croes, miho conoci como Endy, a logra su diploma MBO como analista kimico na aña 1989 y na 1991 a obtene su Associate’s Degree den e mesun ramo. E tabata presidente di Fundacion Lotto Pa Deporte, despues a bira director di Fundacion Lotto pa Deporte, promotor di evento, presidente di Aruba Softball Bond y vice presidente di World Baseball Softball Confederation. Na aña 2010 a investig’e y kit’e for di Lotto pa Deporte pa mal maneho y pa enrikece su mes y famia. 

Djey el a drenta politica y riba lista di MEP el a haya 509 voto den su prome salida den eleccion na 2013. El a crece na 850 voto den eleccion na aña 2017 y den e ultimo eleccion na aña 2021 el a sigui crece te na 1006 voto. A nombr’e como Minister di Enseñansa y Deporte. E ta e minister cu menos voto individual den e coalicion MEP-Raiz.

Tocante Headlines Group

Mark-Benson Denz a funda e prome website di noticia na Aruba, 24ora.com (Prome den Noticia) dia 28 di maart 2007. Awendia e ta e medio di comunicacion di mas grandi den Caribe Hulandes. Diariamente mas di 25 mil diferente usuario ta subi online, mas di 4 biaha y ta keda casi 3 minuut cada biaha. Pa siman ta surpasa 75 mil usuario y pa luna e ta mas di 225 mil diferente usuario. Riba Facebook nos ta e pagina di Aruba cu mas “likes” (124K), mas siguido “followers” (194K) y tambe cu hopi mas “engagement”. E mas reciente adkisicion ta e corant digital TREMPAN, cu mas pagina, mas contenido y hasta video pa lesadonan y usuarionan por disfruta di dje digitalmente.

Den aña 2023, e website mas mira na Aruba, esta 24ora.com, a crece den audiencia, cu siguidonan cu a consumi 43,206,312 minuut riba e website. A cera aña cu no menos di 123.975 likes riba Facebook, mientras cu e cantidad di siguido (followers) tabata 188.218. Riba Instagram nos tin 23.000 siguido. Cifranan aki ta marca un crecemento grandi compara cu e aña prome.





Source link

More in Caribe

A2Z ADMINISTRATION

AD

To Top