Caminda di Cruz Dakota diferente cu otro aña

Diabierna Parokia Birgen di Fatima Dakota un biaha mas a tene su Caminda di Cruz Bibo. 

Caminda di Cruz Bibo ta un tradicion di hopi aña di e parokia di Dakota. 

E procesion di e anja aki tabata un poco diferente, compara cu e añanan anterior. E ta un manera diferente, pasobra e aña aki no tabata tin tur e personahenan cu normalmente tin, no tabata tin e sutamento di Hesus. E biaha aki tabata tin Hesus su so den e cayanan di Dakota y e unico personahe cu tabata cu ne ta Maria. E otro personahenan no t’ey, pero otro aña nan lo t’ey bek.

E Caminda di Cruz ta un momento pa reflexiona loke Hesus a haci pa humanidad mas di dos mil añ pasa, door di entrega Su bida pa nos tur por tin bida eterno.

Tabata un bunita procesion, cu a conta cu participacion di mucha, cual ta un manera pa inculca e amor pa Dios den curason di nos muchanan. 

Gina Nuboer, un di e organisadonan tabata hopi contento di por a trece dilanti loke nan tabata desea di trece dilanti, e Pasion di Cristo. 

E biaha aki tabata diferente, un rato e tabata hopi emocional. E musica tambe tabata tin su impacto riba emocion di e publico, Nuboer a bisa.

Despues di dos aña di ausencia, un biaha mas e Caminda di Cruz Bibo tabata  presente den e cayanan di Dakota y hopi hende toch a bin presencia e evento aki. 

Tabata tin menos participante, unico persona cu tabata banda di Hesus tabata Maria. Esaki tabata den memoria di tur esunnan cu a fayece durante e pandemia, cu a fayece nan so. Hesus practicamente a fayece su so.

Tabata tin crucificacion, pero e tabata diferente. Por a tende us grita, ora cu e clabo tabata drenta su mannan. No tabata tin un soldaat cu tabata haci esey cu ne. 

Hesus tabata grita y bo no tabata mira ken tabata clab’e. Bo no ta mira e clabo, pero si e tabata sinti dolor. 

E personahe di Hesus a sinti e dolor di Hesus. 

Arthur Comenencia, a cuminsa na bisa cu tabata un honor pa cana den pia di Cristo. Por a sinti cu e cruz tabata bira mas pisa cada rato. Por imagina con pisa e cruz, cu e tabata carga, tabata ta. 

Ta un reflexion pa un y tur bini na pia di Cristo, cu nunca no ta laat.