BZK: Hulanda ta habri pa un forma di ley di hybride, aunke RAFt ta keda riba mesa

Posted on 09/8/2023 10:01 am AST | Updated on 09/8/2023 10:03 am AST

DEN HAAG – Mientras cu secretario di estado Hulandes pa asuntonan di Reino Alexandra van Huffelen ta dispuesto pa papia riba un forma di ley di hibride pa e supervision financiero, e RAFt ta keto bay riba mesa. Asina BZK a confirma pa noticiacla diabierna mainta. Pues no ta asina cu, contrario na loke cierto medio ta informa cu ta laga e RAFT cay, of bari esaki for di mes. “E secretario di estado a scirbi den su carta cu supervision financiero structural mester wordo regla via un Rijkswet”, BZK ta sigui bisa. “Pero Hulanda ta dispuesto pa papia riba un forma di hybride. Con esaki mester bira, ta wordo discuti prome riba nivel di ambtenaar, manera e secretario di estado a propone na Aruba”, ta sigui bisa noticiacla. “ (E ley di) RAFt ta sigui riba mesa si!” BZK ta sigui bisa noticiacla. “E concepto di ley ta riba mesa cerca Parlamento pa tratamento”, BZK ta finalisa bisando. 

GOBIERNO DI ARUBA

Tabata diahuebs mainta cu prome minister Evelyn Wever Croes a splica Parlamento cu Gobierno di Aruba a haci un proposicion pa yega na un acuerdo riba liñanan grandi. Den e acuerdo aki, Gobierno a propone pa traha cu un solucion hibride, un Rijkswet, Ley di Reino, cu ta regla algun aspecto y un Landsverordening, un ley local, cu ta regla algun aspecto. Den esaki a laga Parlamento cu tur su autoridad y su autonomia. “Esaki ta loke cu Parlamento a indica tambe y esaki nos a ofrece na Hulanda”, Prome Minister a remarca. 

Prome Minister a duna di conoce cu den e acuerdo aki, Gobierno a pone e condicionnan cu Parlamento a indica cu lo kier den un negosacion asina. E mandatario a bisa tambe cu Gobierno, diaranson 6 di september, a haya un contesta for di Hulanda riba e propuesta aki na unda cu Hulanda a indica di ta dispuesto pa sigui papia riba e tema di solucion hibride. Deleberacionnan riba esaki lo continua den e temponan nos dilanti pa propone kico ta bay den un Ley di Reino y kico ta bay den un Ley Local.

INTERPRETACION

Cierto persona y media a interpreta cu esaki ta nifica cu Hulanda ta laga RAFt cay y papia riba un otro areglo. Pero Hulanda diabierna mainta a laga sa cu mientras cu enberdad ta dispuesto pa papia riba e ley di hibryde, e ley di RAFt ta riba mesa, pues por compronde cu e hecho cu ta dispuesto pa trata e ley di hybride, no kier men cu e ley di RAFt ta wordo hala un banda. 

TA CUMINSA COBRA INTERES HALTO

Loke cu ayera tambe prome minister a confirma ta cu mirando cu dia 10 di october proximo e debenan ta bay madura, ta preparando e documentonan pa fiansa riba interes halto di mercado pa paga bek den 20 aña pero cu un clausula cu por tuma den consideracion cu si Gobierno di Aruba yega na un entendimiento di gobierno pa gobierno prome cu fin di aña, lo ta dispuesto pa baha e interes ainda. Loke esaki tambe kier men, ta cu pa por lo menos 2 aña Aruba ta cuminsa pagta e interes halto di entre 6 pa 8%.