Boto yen di indocumentado a yega costa di Corsou y ainda tin den mondi

Posted on 09/7/2023 9:40 am AST | Updated on 09/7/2023 9:40 am AST

WILLEMSTAD- Un boto yen yen di indokumentado a yega nos kosta ayera mardugá pa mainta i te ku ayera nochi ainda tabatin hopi di e hendenan aki ku a baha na kosta i a bai skonde den e mondi na Fuik/Mijnmaatschappij.

Polis a informá ku ayera, den kareda di 7 or di mainta nan a haña informashon di Warda Kosta ku a tuma nota di un lancha ku tabata algun mia na parti ost di Kòrsou i ku tabata yegando kosta.

A dirigí algun unidat polisial den e área indiká ku ta ubiká ost di Mijnmaatschappij i den e mondi a topa na promé instante ku un hòmber, un hende muhé i un mucha hòmber menor di edat.

Kontinuando ku e investigashon den e área ei, un di e unidatnan a topa ku dos otro hòmber ku tabata skondí. Den e besindario di e hòmbernan a haña tambe un saku konteniendo 7 arma di kandela i dos paki di kokaina.

A konfiská esakinan miéntras ku e kuater adultonan, di kua 3 venezolano, A.S.D.B., R.E.M.H. i E.C.F.D. di respektivamente 46, 41, 39 aña di edat i e hòmber di Ecuador D.N.C.C. di 37 aña di edat a keda detené i entregá na e Divishon di Krímen Organisá.

Nan ta keda sospechá di kontrabanda di hende, i violashon di lei di opio i di arma di kandela.

Polis ta sigui informá ku for di investigashon mas leu a sali na kla ku mama di e menor di edat J.G.P.Z. di 23 aña ya ta permanesiendo riba nos isla i na momentu ku e último aki a presentá na warda huntu ku wela di e menor, e hende muhé M.N.Z.V. di 43 aña di edat, ámbos venezolano, tambe a keda detené.

Di informashon ku polis ta optené, lo mester tin mas persona ku a yega ku e lancha, ku ainda ta skondí den e mondi. E búskeda di esakinan ta kontinuá.

Segun informashonnan risibí, lo tabata un lancha ku mas di 40 hende ku a yega baha esakinan i a bira bandoná Kòrsou mesora. Te ku ayera nochi lat ainda polisnan tabata buskando den área pariba. NOTA: Texto ta scirbi den Papiamento fonetico di Corsou.