Connect with us

Bingo Aruba cu donacion special na Stichting Ambiente Feliz

Aruba

Bingo Aruba cu donacion special na Stichting Ambiente Feliz


Diaranson tabata un dia super special pa Stichting Ambiente Feliz na momento cu nan a ricibi un donacion special di Bingo Aruba.

Pa e fundacion, e donacion aki ta uno hopi importante, vooral pa e fundacion cu ta pasando den un crisis, despues di e pandemia, segun Irma Dirksz, groepleidster di Ambiente Feliz.  E ta un donacion cu sigur ta bonbini y ta yega na ora, ya cu e fundacion mester di hopi donacion.

Awo cu ta vakantie grandi, nan clientenan lo ta na cas, pa cual e donacion lo yuda pa haci algun actividad pa nan clientenan. Un parti tambe, despues lo por bay pa cuminsa busca un otro bus, ya cu nan bus cu nan tin actualmente a cuminsa bira bieu.

Stichting Ambiente Feliz tin mester di mas donacion, ya cu nan tin mas proyecto nan caminda. Nan ta sperando tambe riba donacion pa esakinan.

Por ultimo, Irma Dirksz a indica cu nan mester di mas donacion panan por sigui traha riba nan plannan pa futuro. Cualkier donacion, sigur, lo ta bonbini.

BINGO ARUBA

Stichting Ambiente Feliz diaranson a ricibi un donacion di 20 mil AWG for di e representante di Bingo Aruba, Madeline Solognier.

Solognier a indica cu nan a ricibi un carta ricibi unda Ambiente Feliz ta pidi yudansa pa nan por logra nan plannan pa futuro y tambe nan plannan recien. Esaki a haci cu nan a pone e fundacion riba un prioridad halto, pa bin na remarca pa ricibi e donacion. Pa awor, esaki ta e di dos donacion cu Five Crown Gaming NV ta haci na Stichting Ambiente Feliz.

Bingo Aruba lo tin pensa di yuda mas fundacion na Aruba cu mester di ayudo. Hopi di e fundacionnan mester di un yudansa y tur cu bin na remarca, lo haya e oportunidad. Chens ta grandi cu den futuro, Sticthing Ambiente Feliz tambe lo bin na remarca un biaha mas. Ta danki na tur e hungadonan di bingo cu a aporta na e donacion aki.

Por ultimo, Solognier a extende un invitacion pa e pueblo di Aruba pa cumpra nan bingo di diadomingo awo, e Mega Father’s Day Bingo, unda cu por gana un minimo di 10 mil AWG.

Na di cinco wega, e hungado di bingo tin chens di gana un iPhone13, ademas di e premio. Cumpra bo carchi, pa bo tin chens di gana y tambe aporta pa haci mas donacion na mas fundacion den futuro.  





Source link

More in Aruba

To Top