Connect with us

Benny na Otmar: Bo encarcelacion ta “Koekje van eigen deeg”

Aruba

Benny na Otmar: Bo encarcelacion ta “Koekje van eigen deeg”


“Mi ta wak hopi di locual Sr. Oduber ta pasando aden, cu ami a pasa aden. Y mi ta kere cu ora bo tend’e bisa cu politica ta esun cu tin’e eynan, anto e ora ey ami ta bis’e koekje van eigen deeg“, asina parlamentario Benny Sevinger di e fraccion di AVP a declara awe merdia durante un entrevista den ENFOKE. E parlamentario a reacciona riba e conferencia di prensa di ex-Minister Otmar Oduber, cu tabata keha cu ta Marisol Lopez a keh’e y cu awe e ta cera y cu Ministerio Publico ta persiguie politicamente.

Benny Sevinger a sigui bisa cu “Abo a cuminsa cu henter e persecucion politico aki. Den eleccion di juli 2017, e prome hende cu a entrega keho contra Benny Sevinger ta e mesun Otmar Oduber. Despues e plataforma di Jan de Ruyter a entrega keho y despues di eleccion den Parlamento, ta e mesun Otmar Oduber a yama un reunion di Parlamento na unda el a bay cerca e mesun Marisol Lopez y tur otro parlamentario di MEP partiendo papel di loke supuestamente Benny Sevinger lo a haci. Despues a pasa un mocion pa obliga Gobierno pa pusha Ministerio Publico pa investiga, a bay bebe koffie cu Procurador General pa papia riba mi caso. Tur esey nan a haci y awo e ta sinti fastioso pasobra ta investigand’e?”, asina Benny Sevinger ta puntra.

E parlamentario ta haya pret cu Otmar Oduber ta yora caba pasobra el a sinta tres dia den KIA y a considera e dianan duro. “Ruman, bo no a yora nada ainda. Ami a pasa setent’i pico dia cera den KIA. Ami n’ yora. M’a para bringa pa mi caso y mi lo sigui bringa pa mi caso tambe pasobra mi ta inocente”, segun Sevinger a afirma cu un bos firme.

Den caso di Avestruz, parlamentario Sevinger ta convenci, e unico meta di e recherchenan ta pa ban caba cu e carera politico di Benny, ban cer’e y ban caba cu partido AVP. El a yega di bisa esaki den pasado y lo sigui ripiti e mesun frase aki pasobra e ta convenci cu ta asina ta.

Na final, Benny Sevinger a finalisa bisando cu “Ami no ta sinti dushi cu bo tin cu bay bek den KIA. Pero no bin yora! Para manera un homber awo pasobra t’abo a cuminsa e cos ‘ki. Abo a bay conspira cu Evelyn, cu MEP, sinta cu nan, despues cu bo sa ki tipo di hende nan ta, pa awo bo bin yora pasobra nan ta detene bo atrobe. No ruman, para manera un homber y defende bo caso”.





Source link

More in Aruba

To Top