AZV y HAVA ta firma contracto nobo despues di diesdos aña 4 aña di negociacion

Den palabranan di Minister di Salud Publico Dangui Oduber, diahuebs (26 di september) tabata un bunita dia pa cuido medico. E contracto firma entre AZC (Algemene Ziektezorg Aruba) y HAVA (Huis Artsen Vereniging Aruba ta uno diferente y moderno.

A bini dilanti cu esaki ta e prome contracto despues di esun cu a firma diesdos aña pasa. Y a logra yega na un acuerdo despues di nada menos cuater aña di negociacion.

E motibo cu a tarda cuater aña tabata pasobra e negociacionnan a inicia den pleno pandemia na aña 2020. “E no tabata un momento facil pa negocia pa yega na un acuerdo pa cambia e formula di compensacion,” Minister Oduber a declara despues di tabata testigo den firmamento di e acuerdo aki.

Loke ta importante den e acuerdo aki ta cu a cambia e formula di compensacion. Antes tabata paga e dokternan di cas un tarifa fiho y awo a introduci e sistema basa riba productividad di e dokternan di cas. “E intencion ta pa recompensa e dokternan di un forma husto y na mesun momento percura pa tin mas productividad. E aseguradonan lo mester bay mira un cambio den e servicio, cu miho servicio y accesibilidad di e dokternan di cas.”

Por corda cu na aña 2023 a firma Acuerdo di Cuido, unda a delinea e prioridadnan. Un di nan tabata fortificacion e prome linea di cuido. Pa logra esaki, e busca mas dokter di cas y mas “praktijk ondersteuners”, y a cuminsa un opleiding pa dokter di cas. A finalisa e proceso nobo cu e acuerdo cu dokternan di cas, e mandatario a bisa.

Minister (demisionario) Dangui Oduber a sigura cu despues di e acuerdo aki, e pashentnan ta haya un miho calidad di cuido y servicio.

Pa e director AZC ir. Edwin Jacobs, kende tabata hopi contento pa a logra yega na e acuerdo aki, a bisa cu e firmamento ta e inicio di un etapa nobo. E ta papia den e relacion di AZV cy HAVA y e dokternan di cas cu e aseguradonan.

Cu e contracto aki a pone hopi enfasis pa e profesionalnan di cuido den prome linea ta hopi mas accesibel pa e aseguradonan. Esaki pasobra ta haya keho regularmente cu no ta semper e pashent ta yega asina facil na e dokter di cas.

E contracto ta haci un diferencia grandi, unda mester produci pa yega na e entrada. Esaki ta stimula e dokternan pa atende e pashentnan. A logra yega na 50 dokter di cas, cu ta cuater mas cu aña pasa. A traha un plan unda cu e asistentenan y e POH-nan lo yuda tuma cierto trabou rutinario for di dokter di cas, bahando e presion cu e profesional aki tin. DI e forma aki e tin mas tempo pa pashentnan nobo of esnan cu mester di  mas tempo di dje. “Cu e contracto aki nos ta duna un reconocemento y baloracion na e trabou di dokter di cas. Y ta habri e comunicacion e comunicacion cu dokter di cas riba diferente medio, stimula door di e temporada di pandemia.”

E ariba menciona ta nifica tambe cu no solamente por presenta personalmente, pero por haya consulta via di whatsapp y otro medionan digital. AZV lo percura pa e dokternan haya compensacion pa e tipo di consultanan aki tambe. “Esaki ta e etapa nobo unda nos aseguradonan ta bay experencia un servicio di dokter di cas cu ta mas accesibel.”

Joaquin van Trigt, dokter di cas y Presidente di HAVA, tabata presente pa firma e contracto aki cu ta valido pa henter e gremio aki. A pesar cu e proceso di negociacion a tuma hopi tempo, e ta contento pasobra a bin ta trahando cu un contracto cu ta 12 aña bieu. “E intencion ta pa sigui reforsa e prome linea di cuido y ta un momento masha importante den e structura di cuido na Aruba,” van Trigt a indica.

No ta desconoci cu e dokternan di cas a bin ta aumenta, no solamente cu cuido di e pashentnan pero tambe pa loke ta e parti administrativo. Tin hopi aspecto cu ta toca e dokter mes,, manera si e mester bay AO, cu mester papia riba dje, pa sigura nan entrada.