Connect with us

Awo cu tin investigacion Portulaca: A likida fundacion di campaña di Andin Bikker

Caribe

Awo cu tin investigacion Portulaca: A likida fundacion di campaña di Andin Bikker


WhatsApp Image 2024 07 01 at 20.05.37 fd2fd4a5

Aunke cu oficialmente ni Andin Bikker y ni su fundacion politico ta sospechoso den e investigacion cu a haya nomber di Portulaca, asina mes a opta pa den pura, likida e fundacion y libra su presidente di tur cargo.

Ta trata aki di Edgar Arends, kende tabata coordinador di ex-Minister Andin Bikker y cu awendia ta coordinador di Minister Glenbert Croes.

Siman pasa a publica den Landscourant di Aruba cu dia 8 di juni 2024, net cuater dia despues cu Ministerio Publico a haci seis diferente “inval” buscando evidencia den un investigacion relaciona cu otorgamento di permiso di estadia y di trabou na Aruba via DIMAS. E dia ey a anuncia cu un di e sospechosonan ta e fundacion politico di Minister Glenbert Croes, cu yama Fundacion Union ta Forsa inscribi na Camara di Comercio na e adres Cumana 84.

Mirando e demas sospechosonan, mayoria ta ex-coordinadornan of tabata cu ex-Minister Andin Bikker, a hala atencion cu e dos fundacionnan politico tin casi e mesun nomber. Esun di Glenbert Croes yama “Fundacion Union ta Forsa” mientras cu esun di Andin Bikker yama “Fundacion Union ta haci Forsa”. E unico palabra cu ta diferencia e dos fundacionnan ta e palabra “haci”. E fundacion ta inscribi na Camara di Comercio na e adres Boegoeroei 52-B y Edgar Arends ta su presidente.

Ta bon pa subraya cu Edgar Arends no ta sospechoso den e caso aki, pero si Landsrecherche a bishita su oficina y a coba den su lessenaar y a hiba varios ekipo di trabou cu tin di haber cu e investigacion. Si esey lo conduci na cualkier interogacion, ainda no ta conoci.

Fundacion likida
Probablemente esaki kiermen final di cualkier intencion pa Andin Bikker di sigui den politica. Na momento cu disolve e fundacion, ta nifica e ora cu no tin interes mas pa sigui sirbi e pais aki como sea Parlamentario of Minister den futuro. Cu e decision di dia 8 di juni 2024, a likida Fundacion Union ta haci forsa oficialmente. Como “vereffenaar” a keda Edgar Arends di Boegoeroei 33-B pero a declara cu e fundacion no tin ningun debe ni actividad mas tampoco.

Ta investigando fundacion di Glenbert Croes

A pensa cu lo por ta un eror entre e fundacionnan, pasobra nan tin casi mesun nomber. Sinembargo, fuentenan yega na e investigacion a sigura cu no ta un eror y cu de facto ta e fundacion di campaña di Glenbert Croes mes nan ta investigando. Consecuentemente a bay na cas di mama di e mandatario, unda cu e fundacion ta inscribi, pero no a haya nada ey pasobra e administracion ta den man di su ruman Junior Croes. Ey a bay cu computer y henter e administracion di e fundacion. Probablemente husticia lo kier investiga si cualkier compania cu a sponsor campaña politico di Glenbert Croes lo a haya un permiso despues ora el a bira Minister di Integracion y a haya DIMAS bou di su encargo.

Bulament’i cura

E reto cu tin den e caso aki y kisas esey ta loke e recherchenan ta purba decifra awo ta e rol di e mesun integrantenan di tempo di Minister Andin Bikker cu a pasa pa Glenbert Croes despues di eleccion na aña 2021. E tempo ey Bikker a keda for di politica y Glenbert Croes a manera “hereda” su hendenan. Ta manera un compromiso cu Croes a haci cu Bikker pa e wanta tur su secretarianan, coordinadornan y campañadonan. Pues, e minister a cambia pero e coordinadornan a keda mas o menos mesun cos y varios di nan awor ta sospechoso of ta envolvi den e investigacion aki awo. Loke si a bin acerca ta un di e coordinadornan di Minister Glenbert Croes mes, cu tambe ta un sospechoso oficial awo, aunke no ta deteni, pero si suspendi di su funcion y prohibi pa drenta Bestuurskantoor.

Ainda un sospechoso ta deteni

Manera por corda, e caso mes ta parti den dos. A cuminsa na investiga esunnan sospecha di corupcion activo, esta esunnan cu ta busca pa, via soborno, pa logra yega a permiso di trabou via DIMAS. Relaciona cu esaki a detene dos Venezolano cu ta traha pa e compania doño di e hotel Hyatt Place situa banda di aeropuerto. Nan dos tabata uza un tramitado specifico pa atende cu nan asuntonan di permiso. Cu e tramitado ta cera keto bay, lo por tin di haber cu un di e sospechosonan cu ta bira importante awo den e caso, ta keto bay na Colombia.

Ta pendiente di Raymond Arends

E comerciante Raymond Arends tabata campañado di Andin Bikker den su tempo, pero ora cu MEP a lag’e sin number y want’e for di lista den eleccion na aña 2021, mesora Arends a join Glenbert Croes di MEP. A campaña pa Croes pero no a bay traha cu ne como coordinador. Parce cu Arends tabata masha pega cu e tramitado en cuestion y tabata yuda den atende cu asunto di permisonan di estadia y trabou den e tempo aya. Si esey a sigui awo bou di e gobernacion nobo, ta loke e investigacion mester saca afo. Pero Raymond Arends casi no ta biba mas na Aruba y ta hopi na Colombia. Ta wardando e yega aki pa por verifica un ke otro di e caso cu ne.

Tocante Portulaca

Landsrecherche, bao guia di hues-comisario y Ministerio Publico y den cooperacion cu Cuerpo Policial di Aruba y RST (Recherche Samenwerkingsteam), a tene “doorzoekingnan” dia 4 di juni 2024 na seis sitio, esta dos cas, dos negoshi, Bestuurskantoor (Ministerio di Integracion, Labor y Energia) y na DIMAS. E doorzoekingnan aki a tuma luga den cuadro di un investigacion di Landsrecherche di posibel delitonan di corupcion y otro echonan castigabel relaciona cu otorgamento di permisonan di estadia entre 2020 y 2022.

E investigacion aki a haya e nomber di Portulaca. Durante e doorzoekingnan, a tuma gegevensdragers (portadornan di dato) y administracion den beslag. E dia ey a detene tres sospechoso, di cual a laga dos bay cas despues y e tramitado, esta Nedilia Dabian, keto bay ta cera na KIA. E investigacion Portulaca ta draai rond di e pregunta si companianan por a obtene permisonan di estadia pa nan empleadonan a base di motibonan cu no ta cuadra cu ley.





Source link

More in Caribe

A2Z ADMINISTRATION

AD

To Top