Connect with us

Awe Parlamento lo scoge e prome Ombudsvrouw di Aruba

Caribe

Awe Parlamento lo scoge e prome Ombudsvrouw di Aruba


Untitled design 15

Ta zona increibel, pero e berdad ta cu e ley pa bin cu un Ombudsman na Aruba a cuminsa su trayecto den Parlamento di Aruba for di aña 2013 caba. Pa mustra con malo nos Parlamento ta funciona y desinteresa pa logra recluta un persona independiente pa sali na defensa di pueblo, a bin aproba e ley te na september di aña 2020, pues shete aña despues! E proceso de reclutacion ta data di september 2023, cu ta dies luna pasa. 

Awe Parlamento di Aruba tin cu dicidi riba dos nomber cu a keda, despues cu George Croes a tene honor na su mes y evita cu ta hunga politica cu ne y cu su funcion y como tal a hala su solicitud aden. Awo ta keda e parlamentarionan pa scoge entre dos hurista femenino, mr. Kathy Ruiz-Paskel of mr. Jurima Bryson. 

Dos aña pasa a ancr’e den constitucion

Na maart 2022, Parlamento di Aruba a haci cambio den nos Constitucion y a ancra e ley di Ombudsman. E cambio di nos Constitucion ta pa yuda haci cu e Ombudsman ta ser reconoci como un colegio halto y independiente. Parlamento a vota unanime e tempo ey.

Kico ta un ombudsman?

E Ombudsman ta un persona of entidad independiente cu na momento cu un persona acudi pa un servicio na un instancia gubernamental,  semi-gubernamental, of “privaatrechtelijk” (manera un fundacion) y e no wordo trata bon, e por acerca un Ombudsman pa haci un investigacion y percura cu e persona ta wordo “goed bejegend” of bon trata. E Ombudsman ta haci investigacion independiente y si ta necesario e por intermedia. E tin un rol preventivo tambe. Na momento cu e sinti cu tin algo cu no ta bayendo bon den un instancia, e por intermedia pa e cliente haya su servicio, manera cu mester ta. 

Esey seguramente lo percura cu e servicio ta bira mas eficiente, pa tin menos fraude, pasobra e persona di Ombudsman lo ta eynan y cu wowonan hancho habri riba e situacion aki. Tambe Parlamento a aproba un Kinderombudsman. Importante ta pa muchanan tambe tin un persona cu na momento cu instancianan no ta atende un mayor of hoben, e por acerca e Kinderombudsman pa por cuestiona of yuda e instancia pa e duna e servicio/ayudo adecua y di calidad.

A cambia e ley

E problemanan a cuminsa ora cu Gabinete Wever-Croes II, forma pa e coalicion MEPRAIZ, a dicidi di adapta e ley di tal forma cu a kita e esencia di independencia di e Ombudsman. Dicon? Pasobra a cambia e ley di tal forma cu no mester dos-tercera voto den Parlamento pa nombr’e y ni pa kit’e fo’i trabou. Esey ta haci e ora cu e nombramento aki ta bira parti di un nombramento politico a base di deseo di e coalicion na mando. Mañan bin un otro gobierno y e no gusta e ombudsman, djis cu un mayoria den parlamento e ta kit’e fo’i trabou. Si a lag’e manera e tabata, cu mester ⅔ parti di e asientonan den parlamento, lo a duna e funcion aki mas peso y gobierno lo no tin chens mes pa persecucion politico.

Ayo independencia

Henter e esencia pa nombra un persona cu un mayoria mas grandi cu djis 11 asiento den Parlamento di Aruba ta pa por garantisa independencia di e persona cu haya e funcion. E lo mester ta un persona cu ta para riba politica y no mag ta dependiente di ningun forma na ningun politico. P’esey a ancr’e den nos constitucion den forma di un organo na nivel di Parlamento di Aruba, Algemene Rekenkamer of Raad van Advies. Pero awo, te hasta pa nombra un, por ripara caba cu ta un nombramento politico a ta bira pasobra ta nenga di sigui conseho di e comision di reclutacion. Di e tres nombernan cu a sugeri, por mira claramente cua e coalicion lo no kier.

E conseho di e comision

“De voordracht aan de Staten bestaat uit een lijst bevattende de namen van 3 kandidaten, gerangschikt naar voorkeur. Om tot de aanbeveling te komen, heeft de commissie belast met voordracht na ontvangst van de resultaten van de naslag, op 8 mei en 11 juni 2024 beraadslaagd. De commissie belast met de voordracht heeft besloten de onderstaande kandidaten, in volgorde van voorkeur, voor te dragen aan de Staten van Aruba voor de functie van Ombudsman. Hierbij wordt benadrukt dat deze voordracht met een meerderheid van stemmen is geschied: mr. Kathleen G. Paskel, mr. Jurima A.R. Bryson en mr. George G.M. Croes. De drie geselecteerde kandidaten zijn ieder formeel op de hoogte gesteld dat zij zijn voorgedragen samen met twee andere kandidaten.”

George Croes a bula’fo

Na momento cu e conseho a lek y cu tur hende a haya sa ken ta e tres candidatonan pa haya e funcion y cua ta esun mas fuerte y cua tabata “the weakest link”, mesora George Croes, actual director di Directie Wetgeving en Juridische Zaken (DWJZ), a opta pa hala su solicitud aden. E no ta interesa mas den e funcion. Pio ora cu for di oposicion a anuncia cu ta bisto cu coalicion lo scoge pa vota pa George Croes ya asina su funcion ta bira vacante y pa un candidato di Raiz por bira director. Cu e forma con e gobierno aki a cambia e ley di ombudsman ta hacie un funcion mucho riesgoso y cu chens cu gobierno por kita bo na cualkier momento.

Ken tabata den e comision

E comision di seleccion ta forma pa presidente di Corte, mr. Mauritsz de Kort, miembro di Raad van Advies, mr. David Kock y un miembro di Algemene Rekenkamer Aruba (ARA). Prome cu nombra e ombudsman/vrouw, tabatin henter un proceso cu a tuma luga, cual ya ta den su culminacion awo. E comision di seleccion a manda e tres nombernan pa Parlamento di Aruba, kende na nan turno lo dicidi durante un reunion publico ken nan ta scoge. 

Prome cu esey, a trata e nombernan den un reunion porta cera, esta; Commissie Houshoudelijke Aangelegenheden (CHA). Eyden, a presenta e conseho y rapport di e comision di seleccion. Despues di esey, e fraccionnan lo duna ‘gevoelens’ riba e nombernan y pa djey trat’e den un reunion publico. 

MEP no kier sigui e conseho

Despues di e reunion interno, e mesun Presidente di Parlamento a anuncia cu e comision no a duna ningun secuencia di nomber. Nan lo a djis duna tres nomber pa parlamento scoge un di nan.  Obvbiamente cu esey no ta berdad, pasobra ariba nos a publica e conseho den forma integral. Door di no sigui e secuencia cu e tres entidadnan a manda, ta demostra claramente cu tin problema pa scoge Kathy Paskel y ta busca tur forma pa pasa rond di dje. 

Mansur a pidi Bryson y Croes pa hala atras

Parlamentario Miguel Mansur di Accion 21 no a para keto riba e metemento di politica den un nombracion asina importante. Durante un entrevista na final di e CHA, Mansur a comenta cu MEP ta “vies” bezig. Djey durante e noticiero “Enfoke” el a pidi na un manera masha trankilo pa Jurima Bryson y George Croes hala nan solicitud aden y laga Paskel mes bira ombudsvrouw. Hasta Mansur a splica nan e wega cu MEP y RAIZ kier hunga. 

George Croes a sigui conseho di Mansur

E mensahe a yega cla cerca e candidato menos popular y menos fuerte, George Croes. Den un carta el a informa su coleganan di DWJZ cu e no ta sigui como un candidato mas y a hala atras. E no a gusta e forma con a trata e tema di ombudsman den prensa. Su tras, presidente di parlamento, mr. Edgard Vrolijk (MEP), a confirma cu George “Guito” Croes a hala atras. 

Awe mester vota

Awe Aruba lo haya sa ken ta bira e prome ombudsvrouw di nos pais. Mainta trempan lo tuma luga un reunion di Comision Central den Parlamento di Aruba y pa 3:30 pm lo sigui un reunion publico caminda lo vota pa nombracion di e prome ombudsvrouw. 





Source link

More in Caribe

A2Z ADMINISTRATION

AD

To Top