Connect with us

Aruba ta bay haya dies Pasadia pa Adulto Mayor

Caribe

Aruba ta bay haya dies Pasadia pa Adulto Mayor


Ursell

Durante e reciente conferencia di prensa di gobierno, Minister di Asuntonan di Adulto Mayor Ursell Arends, a informa di e decision tuma pa habri dies pasadia pa Adulto Mayor den diferente districto di Aruba. Esaki ta un resultado di e Forum di Adulto Mayor cu a tuma luga aña pasa.

Den e presupuesto supletorio a logra pone casi 5 miyon florin cu lo bay wordo uza pa haci e proyecto di Pasadia posibel, e mandatario a bisa na inicio di siman.

E programa aki ta dirigi specificamente riba e Adulto(nan) Mayor cu ta biba nan so, y ta vulnerabel. Ta tene cuenta cu e grupo cu no tin e red social pa bay riba dje y ta biba den isolacion. Un di e gruponan aki ta esnan cu a bin duna man na e economia di Aruba, trahando den sector turistico. Y awo cu nan ta un Adulto Mayor no tin famia pa duna nan un man. “Nos mester brinda nan e ayudo y asistencia medico cu nan mester.”

E grupo lo haci actividad hunto y ta brinda nan e oportunidad socialisa cu otro personanan di nan mesun edad. Un posibilidad ta terapia di musica y mehora e calidad nutricional di e adulto mayor, ya cu nan lo haya cuminda cayente na e centro.

Punto di salida cu e programa aki ta e Delta Plan cu ta papia di permiti e adulto mayor di biba mas tanto tempo den su mesun ambiente. Door di  brinda cuminda cayente tambe ta trece structura den bida di e adulto mayor.

E obhetivo ta pa garantisa cu e adulto mayor por sigui biba mas largo den su mesun caso, alivia e cuido informal y alivio di atencion primario. Lo bay tin cupo na mas o menos 250 adulto mayor.

Lo bay tin diferente tipo di pasadia, segun necesidad di e adultonan mayor.

Tambe Minister Arends a menciona cu e lista di espera pa cas di cuido tempo cu el a bira minister tabata 220 y a logra bah’e te na 150 persona. Kisas un parti di e grupo aki lo por bay haci uzo di e pasadia.

Tin varios partner, manera Wit Gele Kruis, Saba, Buurtzorg, Cas Marie, YMCA, Cruz Cora y Club Kibrahacha.

Cas Marie ta e prome cu a habri su portanan den Santa Cruz diamars, y di e forma aki a bira e prome pasadia cu a bira posibel bou di e programa nobo aki.  CasMarie Mama Tis ta concentra pa laga e grupo haci loke ainda nan por haci.

New Picture 50

E variantenan di Pasadia ta: Pasadia na un luga nobo cu un concepto completo; Pasadia den colaboracion cu entidad existente cu concepto den co-creacion (manera CasMarie) y Pasadia Satelite. E ultimo aki ta prepara e hendenan pero sin haya subsidio di gobierno.

Esnan di e concepto completo lo ta na: Oranjestad, den Centro di Caya Betico Croes; FCCA Cunucu Aboy y FCCA Paradera; Kibrahacha, Oficina di Dokter na San Nicolas. Pa e di dos variante lo bay tin na: CasMarie na Noord, Santa Cruz (a habri caba ayera); Saba Oranjestad y Saba San Nicolas.

E pasadia satelite lo ta: Rode Kruis San Nicolas.  Pa e aña’ki shete lo habri nan portanan y na inicio di otro aña e ultimo tresnan. Lo percura pa transporte pa tur adulto mayor por yega na e punto. 





Source link

More in Caribe

A2Z ADMINISTRATION

AD

To Top