Connect with us

Aruba ta anfitrion di e prome edicion di Golden Athlete Caribbean Championship Serie

Aruba

Aruba ta anfitrion di e prome edicion di Golden Athlete Caribbean Championship Serie


Despues di casi dos aña lidiando cu un pandemia, den cua a para actividad social, cultural y deportivo, porfin cos ta bayendo bek na normalidad y Aruba a reinicia tur actividad. Asina tambe e aña aki lo bay tuma luga un torneo di softball di Golden Athlete Caribbean Championship Serie, cu mester a tuma luga dos aña pasa.

Segun Tico Loopstok, organisador di Golden Athlete Caribbean Championship Serie, e torneo aki ta conta cu ekipo di Republica Dominica, St. Maarten, Corsou y Aruba e aña aki. Apertura oficial ta diahuebs dia 26 di mei pa 2:00 pm y lo finalisa diadomingo dia 29 di mei.

Loopstok a splica cu e idea ta pa expande e torneo aki. Idea tabata pa e aña aki tanto Puerto Rico como Boneiro tambe participa, pero debi na e situacion di vuelo (Puerto Rico) esaki no tabata posibel y Boneiro a caba di bin for di un torneo di Colombia, pues tampoco a logra participa e aña aki. E torneo di softball ta di liga 50 y 60, pero idea ta pa otro aña tin liga 40 tambe y tambe otro aña esaki lo tuma luga na Republica Dominicana. Idea ta pa tur aña tin un otro sede como anfitrion, pues ta spera cu aki dos aña e lo ta na Puerto Rico. 

Como organisador di e torneo, Loopstok a splica cu sigur esaki ta atrae publico turistico y ta spera cu en berdad esaki contribui na e desaroyo economico di Aruba. El a gradici e ekipo di Flatstone y tambe Jeffrey Bislip pa traha duro riba e veld pa esaki ta den top condicion pa asina e ekiponan por hunga. Tambe el a gradici algun amigo di Corsou y Republica Dominicana pa a yuda aporta na e organisacion di e torneo aki.

Pa un relato mas amplio, lesa edicion di TREMPAN.





Source link

More in Aruba

To Top