Connect with us

Aruba Excellence Foundation ta anuncia “BuddyLove” como embahador pa su campaña nobo di Aruba Certification Program – ‘E Efecto di bo Zjeito’

Aruba

Aruba Excellence Foundation ta anuncia “BuddyLove” como embahador pa su campaña nobo di Aruba Certification Program – ‘E Efecto di bo Zjeito’


Aruba Excellence Foundation (A.E.F.) recientemente a lansa su campaña nobo pa e siguiente lunanan benidero, Juli te cu October 2022 en conexion cu e programa di certificacion, conoci como Aruba Certification Program (A.C.P.). Na mes momento a anuncia artista local Jair Vesprey, miho conoci como BuddyLove, como figura responsabel pa comparti mensahe di e campaña aki – cual ta pa brinda cada bishitante servicio excelente cu Zjeito, den otro palabra, trata cada bishitante cu amor, carisma, orguyo na un manera autentico y creativo.

Como parti di e campaña, BuddyLove lo crea contenido atractivo y creativo cu informacionnan clave di e programa di A.C.P. ariba rednan social como meta pa comparti mensahe di e programa aki na pueblo di Aruba completo. Banda di ta e figura cu lo personifica e campaña nobo aki, BuddyLove lo ta presente na tur nos actividadnan publico relaciona cu promocion di A.C.P.

Jeanchrisjair Vesprey, mihor conoci como “BuddyLove” a cuminsa su carera musical for di un edad relativamente jong presentando na diferente festivalnan di canto, entre otro “Voz-i-landia”, Calypso & Roadmarch Infantil y Hubenil, y tambe “Sparkling Tour”.

Durante su estudio na Hulanda, el’a logra amplia su experencia musical cu su participacion den programanan di canto internacional manera “X Factor” y “Idols”.
Aña pasa, na 2021, hunto cu Rodrick “Rocco”Franken, Jair “BuddyLove” a logra gana e titulo maximo di “Un Canto na Nos Himno y Bandera” cu e cancion “Ora Sanger Yama”.
Awendia por mira y scucha Jair “BuddyLove” den e banda popular Buleria Aruba, Hits & Fun y tambe colaborando cu diferente artistanan y companianan local.

Aruba Excellence Foundation kier recorda pueblo di Aruba cu pa luna di Juli te cu October 2022 lo brinda e programa di certificacion face-to-face pa solamente Awg. 50,-. Normalmente participacion face-to-face ta costa Awg. 100,- pero cu e promocion aki no solamente hotelnan por participa pero tambe tur hende cu ta forma parti di nos comunidad cu tambe ta desea di por brinda informacion mas amplio di Aruba y tambe cu lo desea di eleva e manera di brinda servicio cu Zjeito.

Alabes, Aruba Excellence Foundation kier a gradici BuddyLove pa acepta e rol importante aki y nos ta spera cu pueblo di Aruba completo brasa e campaña nobo aki y masalmente inskirbi pa certifica.

Pa registra ta facil: bishita nos website www.acp.aw y click riba e opcion cu ta indica cu tin promocion andando, por escohe pa participa mainta di 9:00am – 11:00am of parti atardi di 4:30pm – 6:30pm.
E training tin un duracion di 2 ora y ta wordo presenta den 3 dia.

Aruba Excellence Foundation a wordo institui door di Aruba Tourism Authority na juni 2018 y ta e fundacion encarga pa entre otro ehecuta e Aruba Certification Program (A.C.P.) como tambe e programa di Happy Information Officers (H.I.O.). Meta principal di e fundacion ta pa sigui desaroya y implementa A.C.P. y H.I.O. como tambe otro programanan specialmente diseña pa certifica personanan cu ta traha den sector di servicio y hospitalidad, p’asina percura cu e nivel di servicio excelente di Aruba ya bon conoci, por keda riba un nivel halto.

 





Source link

More in Aruba

To Top