Connect with us

Artesano di Aruba y Colombia a fortalece laso creativo durante intercambio cultural

Caribe

Artesano di Aruba y Colombia a fortalece laso creativo durante intercambio cultural


Image6

Durante luna di april, un grupo di tres artesano Arubano a participa den un programa di intercambio di conocemento cu e ciudadnan di Miranda y Popayan, ubica den e departamento di Cauca, Colombia. A selecta e artesanonan local, Olga Londoño, Fausta Luna y Maria Elena Valencillos Jimenez p’e intercambo enrikecedo aki.

Fundacion Pulso, encarga pa crea un brug entre e sector creativo di Aruba y esun di Colombia, a organisa e intercambio aki. E fundacion ta busca pa fomenta un desaroyo sostenibel den mundo di arte mediante e conexion di comunidad artistico di ambos pais. A traves di e colaboracion aki, ta spera pa stipula e crecemento artistico y cultural den ambos comunidad.

E artesanonan a participa den diferente workshop creativo, incluyendo tecnica di crochet ‘Guajiro’, trabao cu klei, mosaico, felpa, traha popchi y joyeria. Tambe nan tabatin e oportunidad di asisti na tayer di arte culinario y dansa folklorico. E workshop crochet ‘Guajiro’ tabata instrui p’e comunidad indigena ‘La Cilia La Calera’, cu a acepta e artesanonan cu brasa habri, compartiendo generosamente nan conocemento.

Tanto e comunidad artistico como p’e alcaldenan di Miranda y Popayan, a ricibi e artesanonan calurosamente, a mustra hopi satisfecho cu e programa y a expresa nan deseo di mira e colaboracion aki desaroya di manera structural.

Cu e conocemento y experiencia adkiri na Colombia, e participantenan di e programa lo ofrece proximamente workshop gratis n’e comunidad Arubano y mini-workshop na tres scol basico. Di e manera aki nan lo por transmiti nan conocemento na adulto y mucha, cu e obhetivo incentiva e desaroyo artistico y haci c e conocementonan aki ta accesibel p’e mayor cantidad di persona posibel. Fundacion Pulso lo proporciona mas detaye riba e workshopnan gratis proximamente.

E programa aki tabata posibel danki n’e sosten di Fonds voor Cultuurparticipatie di Hulanda, cu e colaboracion di e alcaldenan di Miranda y Popayan. Tambe ta gradici e respaldo di e consulado Colombiano na Aruba y e consulado Hulandes na Colombia.

Fundacion Pulso ta desea di gradici e artesanonan di Aruba pa nan entusiasmo y dedicacion n’e programa aki. Pa mas informacion riba Fundacion Pulso, por tuma contacto cu nan a traves di e-mail [email protected].





Source link

More in Caribe

A2Z ADMINISTRATION

AD

To Top