Connect with us

Amienda di A21: Exigi educacion nivel HBO pa bira minister

Aruba

Amienda di A21: Exigi educacion nivel HBO pa bira minister


Dialuna awo Parlamento lo trata e ultimo concepto di e ley di integridad pa candidatonan pa nominacion como minister. No ta cuestiona e importancia di dicho ley pero ta peor pasa un ley cu ta simplemente crea e ilusion di legitimidad cu no pasa nada. E concepto di ley actual tin varios fayo y den nos opinion, esun mas grandi ta cu e ta nenga di acepta nos realidad politico.

Si e pasa den su forma actual, e lo simplemente formalisa e proceso defecto cu ta existi actualmente. E conflicto di interes mas grandi ta cu formado ta un candidato pa nominacion como minister. No solamente e tin un interes pa gobierno forma pa por bira minister pero tambe e no ta den un posicion obhetivo pa nenga demandanan di un candidato di ken e mester sosten pa e gobierno por forma. 

ACCION 21 lo propone un amienda cu nan ta spera di lo conta cu sosten di tur fraccion, pa sanea e deficiencianan den e concepto di ley actual. E prome cambio ta hancra den ley cu formado, mester ta un persona apolitico cu no ta un candidato pa minister. E di dos cambio ta cu nos amienda ta establece un nivel minimo di HBO pa por nomina como minister. E dos cambionan aki ta elimina e conflicto di interes existente y garantisa cu lo elegi e miho candidato(nan) di e partido(nan) formando gobierno como minister. 

Mirando cu na aña 1999, Director di Veiligheids Dienst Aruba (VDA) a tuma su retiro pasobra formado no a tuma na cuenta su aviso negativo y gobernador no a para e nominacion ta importante pa Parlamento haya un rol den e proceso. “Nos amienda ta crea un Comision Fiho di Parlamento pa screening di candidato(nan) pa nominacion como minister. Dicho comision lo consisti di tur lider di fraccion y lo ta encabesa pa e lider di e partido mas grandi di oposicion, asina fortificando mas un sistema di checks and balances“, asina Miguel Mansur a splica.

Si automaticamente lider di e partido mas grandi di oposicion ta presidente di e Comision Parlamentario pa screening, pueblo tin un garantia mas cu lo no tuma e comision rehen door di p.e. controla cuanto biaha e ta reuni y kico e puntonan di agenda lo ta. Asina lo por garantisa, no solamente un rol activo pa Parlamento, pero tambe cu e resultadonan di screening lo pasa un proceso di revision robusto.

E existencia di un Comision Parlamentario tambe lo habri caminda pa un candidato por apela pa excepcion, si acaso e tin mester di eherce actividadnan auxiliar pa mantene su licencia. Den e concepto di ley actual, siguiendo e recomendacion di Raad van Advies, a elimina e excepcion pa cierto profesionalnan. “Nos ta kere cu esaki ta contraproductivo y inhusto pasobra no ta spera cu ningun persona lo sirbi como minister te edad di pensioen. Mirando cu tin mas persona hoben den politica, incluyendo dokter y psicologo, ta importante pa nan por mantene nan licencia pa despues por bolbe na nan carera despues di nan retiro fo’i politica”, di acuerdo cu Miguel Mansur di Fraccion Accion 21. 

“Nos amienda tambe ta tuma na cuenta cu por existi relacionnan, manera esun di un candidato pa nominacion como minister y un amante, cu tambe por crea un conflicto di interes no desea. Cu e concepto di ley actual no ta atend’e. E cambionan cu nos ta propone ta duna formado e posibilidad di investiga lasonan cu personanan relaciona cu no ta necesariamente famia, segun definicion di e concepto di ley, asina mehorando e resultado di screen un candidato pa minister. Tambe nos ta reconoce cu dinamicanan di famia por ta complica y den e caso caminda un candidato tin un famia bibando den exterior, cu no ta den cuadro di leynan local, e mester por apela na e Comision Parlamentario pa un excepcion, si dicho famia no ta cooperativo den haci e declaracionnan necesario pa su nominacion ta exitoso”. 

Miguel Mansur ta un inversionista cu a bira un politico, despues di funda su mesun partido. E ta boga pa un politica nobo cu gobernacion confiabel na Aruba cu di berdad ta traha pa pueblo. El a studia na Seroe Colorado School na Aruba, despues a sigui International School of Aruba, despues a sigui Institut Le Rosey y finalmente a caba Tufts University na Medford, na Massachusetts, na Merca. El a caba e estudio den International Relations and Economics. Desde aña pasa e ta presidente di Capitable LLC, cu oficina na Miami, Florida. Desde october 2020, Mansur a funda Partido Accion 21, a participa den eleccion na juni ultimo y a logra no menos di 2019 voto riba su nomber. E ta e di cinco votegetter den eleccion di 2021.

E cambionan na e concepto di ley lo fortifica y modernisa e procesonan bao cual ta nomina un candidato y despues nombra como minister si dicho candidatura ta exitoso. Mas cu esey e ta crea un rol importante pa Parlamento, cu no solamente ta garantisa un tercer pilar di legitimidad, pero tambe provee candidatonan cu un mecanismo di apelacion asina salvaguardiando un proceso husto di tur banda. “Nos ta spera cu nos coleganan di Parlamento sostene e cambionan positivo den e amienda cu lo garantisa un miho gobierno y asina un miho pais pa futuro generacionnan di Aruba”, asina Miguel Mansur a termina bisando. 





Source link

Click to comment

Leave a Reply

Your email address will not be published. Required fields are marked *

More in Aruba

To Top