Connect with us

Abogado ta cuestiona e decision: Cuater Bombero a haya nan retiro despues di casi cuater aña di investigacion

Caribe

Abogado ta cuestiona e decision: Cuater Bombero a haya nan retiro despues di casi cuater aña di investigacion


Untitled design 60

Despues di casi cuater (4) aña di investigacion, gobierno dicidi di retira cuater funcionario miembro di Cuerpo di Bombero. E motibo principal ta incumplimento di nan tarea como un funcionario publico. Naturalmente esaki tabata algo cu nan no a acepta y a bay corte, pidiendo pa pone nan bek na trabou. Cu excepcion di un, e otro tresnan ta Bombero di profesion y no sa haci nada otro. 

Ta papia aki di Ferdinand Ponson, Orlando Arends, Edward de Cuba y Gino Tromp. E caso aki tin di e obhecion cu a entrega contra nan retiro di maart ultimo. E tempo ey e minister encarga cu Brandweer a dicidi di kita nan for di trabou basa riba incumplimento di nan tarea como ambtenaar, nan forma di actua cu ta haci cu nan no ta capacita pa nan funciona. Y tambe e mentalidad no ta uno cu ta caracterisa un bon empleado publico. Incluso den e grupo tin un commandant, cu e minister a conclui cu e no tin e caracteristicanan di liderazgo den Cuerpo di Bombero. 

E huristanan di gobierno a trece dilanti tur loke cu a pasa, unda cu tin un abuso di overtime, envolvi den caso penal, a cumpra / haya material di Cuerpo di Bombero na prijs barata y despues bende mas caro, tambe practica di nevenactiviteiten ta e motibonan cu e mandatario a uza pa retira e cuater personanan aki for di trabou. Un di a ocupa un funcion den un fundacion sin avisa su hefe, e casa di un di nan tin un negoshi, etc. 

674A3985

Un di e puntonan tabata e “lista largo di overtime cu ta igual na dos aña y mey di trabou”. A puntra un di e funcionarionan di Cuerpo di Bombero y el a splica cu nan tabata traha na 40% menos di nan capacidad y tur cos ta bay manual. Pues no tin un sistema automatisa.

Nan abogado mr. David Kock a rechasa tur e ponencianan aki den corte y a haci un peticion pa scucha algun testigo. El a bisa cu e por defende su clientenan contra tur e ponencianan di gobierno, pero kier demostra cu nan defensa ta basa riba echo y pa e motibo aki e ta haya necesario pa scucha algun testigo. 

Ta casi cuater aña pasa, mr. David Kock a splica, e cuater personanan aki a haya un carta cu nan no ta permiti pa drenta e facilidad di Cuerpo di Bombero cu a dura algun siman. Na final di e periodo ey, a schors tur cuater pendiente investigacion andando. Y e parti aki ta data mas cu tres aña pasa.  Y tres aña despues, ta tuma e decision pa retira nan. Un landsbesluit poco straño door di e largura di esaki. Incluso hues mes a haya esaki straño. 

E intrigante di e caso aki ta cu hues a bisa cu a pone e cuater caso aki hunto, pero ta trata nan separa. Ta parce cu gobierno a pone un lista di motibo pa cu e retironan, sinembargo no ta bon specifica cual argumento ta conta pa cual di e bomberonan. “E forma con cos a bay, ta totalmente robes pa nos,” abogado Kock a trece dilanti.

674A3983

Tin algun punto cu a wordo discuti den reunion unda mas cu un persona tabata presente of den otro presencia di otronan. Pa e motibo aki e abogado a haci un peticion na corte pa scucha ex-ministernan Dowers y Bikker, pero tambe algun otro consehero of coordinador di e personanan ey. Riba e punto aki no a tuma un decision ainda.

Hues na final a bisa cu e ta bay analisa tur e puntonan argumenta como motibo di retiro. Si tur ta valido of no. Of cual no ta valido y di esnan cu ta valido, si nan ta di suficiente peso pa duna un persona su retiro. Y teniendo cuenta cu nan añanan largo di servicio y e situacion fastioso den cual nan ta awo, na cas sin trabou. Y no  mester lubida, e abogado a bisa, durante tres aña largo gobierno no a tuma ningun decision. 

Un preocupacion cu e mes a trece dilanti ta “den caso di ambtenaar ta parce cu Ministerio Publico ta laga gobierno mira den e dossier di un hende. Nos a bisa cu esaki no ta posibel. Cosnan cu tin den e dossier ta hinca den e Landsbesluit. E uniconan cu por tin inzage den un dossier ta Ministerio Publico, abogado y hues. OM ta laga gobierno bin wak den e dossier y pa nos esey ta increibel di a scuch’e y nos kier haya un decision di hues riba esaki.”

Otro critica cu a bin dilanti ta cu diahuebs ultimo a entrega un serie di documento pa cual nan a haya instruccion di hues pa numera tur cos. 

Na final di tratamento hues a pidi Griffier un fecha pa entrega su decision y a haya e fecha te cu september. “Nos no por laga e hendenan aki keda mucho tempo den incertidumbre. Nan ta cas sin entrada y no por keda spera mucho,” y esaki ta momento cu a pone e fecha di prome di juli pa e hues bisa kico ta bay pasa. Segun e magistrado, e dia ey e lo informa si e ta bay di acuerdo pa scucha e testigonan pidi of e ta cera tratamento di e caso.  

E peticion di e abogado ta pa pone nan tur bek na trabou. “Esey ta unico cos cu nan sa haci, ta Bombero.”

Abogado den entrevista duna a bisa cu su clientenan ta personanan cu masha hopi aña di servicio. Entre e grupo tin un commandant, kende a wordo manda den exterior pa studia y ocupa e puesto cu e tabatin te cu prome cu e decision di dun’e su retiro. “Un hende asina dificil por bay haci algo otro despues di 26 aña di servicio. No ta tiki aña di servicio nan tin. Y no ta hende cu prome cu e sucedido tabatin otro keho contra di nan. Nos no sa kico tin tras tur di esaki.”

E cuater personanan aki tabata forma parti di un di e tres Team di Maneho cu Cuerpo di Bombero a conoce e ultimo añanan.

Segun a bini dilanti den corte, ta buscando un Comandante na Hulanda. Y por a compronde mas cu un persona a bandona e cuerpo e ultimo añanan.





Source link

More in Caribe

A2Z ADMINISTRATION

AD

To Top