A.T.A. ta Rindi Honor na Michael Kuiperi

Un lider y visionario den industria di turismo di Aruba 

Cu hopi orguyo, A.T.A. a forma parti di e ceremonia pa reconoce y rindi honor na Michael Kuiperi, un pilar/baluarte di e industria di turismo di Aruba. Den presencia di su famia y amistadnan, Prome Minister di Aruba, Minister di Turismo y demas invitadonan special, Ronella Croes a hiba palabra den nomber di A.T.A. pa celebra e legado y logronan di Michael Kuiperi.

Michael Kuiperi a fungi como director di Aruba Tourism Bureau for di aña 1958 te cu aña 1971, y tabata tin un rol prominente den formacion y desaroyo di e industria di turismo di Aruba. 

E trayectoria di Michael Kuiperi como lider di Aruba Tourism Bureau a cuminsa na un momento critico ora e economia di Aruba tabata depende di e refineria. E liderazgo y vision di Michael Kuiperi a conduci na establecimento di Oficina di Turismo di Aruba, cu a precede e Aruba Tourism Authority cu nos conoce awe. Un lider cu a inspira tur otro director cu a bin despues di su persona, esta Sr. Beti Arends, Sr. Rory Arends, Sr. Remigio Wever, Sr. Jan van Nes, Sra. Myrna Jansen, y Sra. Ronella Croes cu desde 2011 ta fungi como CEO di Aruba Tourism Authority. 

Durante tur e añanan, Michael Kuiperi a traha duro pa promove Aruba como un destinacion turistico den tur tempo, incluyendo den cara di desafio y tempestad. Apesar di hopi retonan, Michael Kuiperi semper a sa di defende e autonomia di Aruba y a traha riba un maneho di aviacion importante bou di e Status Aparte. Den su rol, ela tuma pasonan importante / significante cu a yuda diversifica e mercadonan di turismo y e a mira e potencial pa e isla bira e centro cultural di Caribe. 

Michael Kuiperi su modelo di exito pa cu desaroyo di turismo tabata basa riba cuater pilar: materianan/recursonan primario, facilidadnan, transporte y esfuerzonan constante di promocion y mercadeo. Ademas, e ta fiel creyente cu e hende, particularmente e cordialidad y sinceridad di e Arubiano tabata e fundeshi pa desaroyo positivo den sector di turismo di Aruba. E vision aki ta sigui resona tanto cu A.T.A. como tambe cu bishitantenan te dia di awe, mirando cu amabilidad y autenticidad a bira e marca di Aruba.

No por keda sin menciona cu bou di Michael Kuiperi su guia, e a sa di recluta figuranan importante cu tambe a bira pilaranan den e sector di turismo, asina poniendo e fundeshi pa crecemento di e sector di turismo di Aruba. 

A.T.A. a expresa gratitud profundo na Michael Kuiperi pa su contribucionnan excepcional na e sector di turismo di Aruba. Su liderazgo, su vision, y su pasion pa e industria di turismo di Aruba ta laga un marca riba nos isla su hospitalidad y e desaroyo economico di Aruba. Na aña 2024, A.T.A. lo honra Michael Kuiperi, Rory Arends, y otro baluartenan riba Plaza Turismo.