Connect with us

A detene Brandon Wouters sospecha di asesinato

Aruba

A detene Brandon Wouters sospecha di asesinato

Recherchenan di San Nicolas a detene un sospechoso importante awe, enconexion cu e caso di asesinato di dia 15 di januari ultimo. A detene Brandon Wouters, naci na Aruba, di apenas 23 aña di edad. A detene e sospechoso aki na su cas situa den Caya Sint Lucia, na San Nicolas.

Cu e detencion aki ta alcansa un complete di 4 sospechoso deteni den e mesun caso di asesinato. Investigacion preliminar ta mustra cu ta un problema entre gangnan. Riba dia di e crimen, testigonan a menciona di lo a mira tres pa cuater mucha homber, bisti na preto, a core sali for di cura di e cas na Pos Chikito, despues di a los tiro riba nan victima. Ta for di e dia ey caba a saca afo cu e crimen aki a sosode den grupo, pues cu tabatin mas sospechoso envolvi den e caso.

A detene Brandon Wouters sospecha di asesinato 5
E victima di asesinato di dia 15 di januari 2021 na Pos Chikito tabata Lisander Leonardo Ignacio, naci na Aruba, dia 9 di november 1999. Awo ta buscando su asesinonan pa presenta nan dilanti hues pa husga nan.

Tocante e sospechoso
Ta bon pa señala cu e sospechoso deteni awe mes ta un victima di e mesun problemanan di gang aki. Algun tempo pasa a tira riba dje, cu consecuencia cu el a keda invalido den un rolstoel. Door di problema di gang awe e no por cana mas.

Ta sospecha cu esey mes ta e motibo tambe cu el a yuda planea e asesinato aki. No ta sigur si e mes tabata fisicamente presente durante e asesinato. Pero, e recherchenan ta bou di e impresion, debi na tip y informacion cu a drenta di testigonan, cu Brandon Wouters a participa activamente den e plannan, strategia y ehecucion di e plan cu a ranca bida di un otro hoben.

Reglament’i cuenta
Tur cos ta mustra, cu e crimen riba su mes lo ta mas bien un reglament’i cuenta entre gang. Ta for di algun tempo caba tin diferente di e acontecimentonan aki tumando luga. Mayoria bes e crimennan ta concentra pariba di brug, den space di Pos Chikito di vecindario. Cada biaha cu esun tira riba miembro di un gang, e otro ta contesta cu un otro atentado bek.

E asesinato
Tabata un diabierna anochi, dia 15 di januari 2021, cu bisiñanan di Sabana Basora, na Pos Chikito, a scucha tiro. Ora a sali pafo a topa cu e hoben Lisander Leonardo Ignacio, naci na Aruba 9 november 1999, morto sinta den un auto, cu herida na cabes. Investigacion forensico a determina cu a tir’e cu un arma di candela den cabes. Pa 10:25 pm dokter Texier a constata morto di e victima cu a ricibi tiro den cabes.

Yuda polis soluciona
Pa polis por resolve mas caso, cooperacion y informacion di pueblo di Aruba ta hopi importante. Pesey ta pidi si tin cualkier informacion, pa yama e tiplijn: 11141. Polis ta garantisa cu tur yamada lo keda anonimo.



Source link

More in Aruba

IMPORTANT ANOUNCEMENT

Advertisement
Advertisement

Trending

Advertisement
Advertisement
To Top